ऊ गयो भन्दिनु

आश त छैन

तर कसैले फेरी सोधिहाले

मेरो बारे

यी केहि शब्दहरु खुलस्त भन्दिनु

धेरै समय पर्ख्यो रे उसले

आज ऊ हिंड्यो भन्दिनु ।

समयका बहावहरुबाट अलग्गिएर

धेरै बेर किनारामा उभियो भन्दिनु

कसैले सोधे मेरो बारे

आएको थियो, गयो भन्दिनु ।

पुरानो चौतारीमा,

धेरै दिन आएर बस्यो रे

पुराना स्मृतिहरु कोट्याउँदै

एक्लोपनको अत्यास मेट्यो रे

तर

बहावहिन संवादहरु बीच

भावानाका कसिला बन्धनबाट,

निस्सासिएर एकदिन

उसले पाइला मोड्यो भन्दिनु

उ गयो भन्दिनु ।।

२०७२/०२/२४  बिमोचन घिमिरे !!